Алтынньы 29 күнүгэр, Уһун-Күөл түмэлигэр, уон ахсыс сыллаахха төрөөбүт, уот силлиэ буурҕаны көрсүбүт, кыырыктаах сэрииттэн ордубут, көҥүл дьол сырдыгын тарҕаппыт Комсомол күнүн бэрт сэргэхтик атаардылар.Болдьоммут чааска күө-дьаа кэпсэтэ, уруккуну санатыһа кыһыл сабыылаах уһун остуолга тэлгэммит быыстапканы: В. И. Ленин туһунан кинигэлэри, урукку комсомол саҕанааҕы активистар тустарынан матырыйааллары, бэл диэтэр Күн Ленин мөссүөннээх комсомольскай билиэттэри көрөн сүргэлэрэ көтөҕүлүннэ. Олохтоох нэһилиэк библиотекара, түмэл үлэһитэ Алексеева М. Н. «Комсомол, эн сулустаах суолун» диэн викторина ыытта. Элбэх боппуруоска эппиэттээн Лыткина А. П. кыайыылааҕынан таҕыста. 2с миэстэни Жиркова С. П., 3с миэстэни Копырина С. М. бириистээх миэстэҕэ таҕыста. Түмүгэр комсомол ырыаларын ыллаан тарҕастылар. Билигин да комсомол өйдөбүлэ биһиэхэ тыыннаах.
